chhod hariyali bhare ujiyaale maidaan,
nikal pade uss kiran ki oor,
pakda fir ek path andhkaar bhara,
ek pagdandi jispe na dikhti bhor,
kaamna ujaale ki karte chale,
chalte chale uss orr
jab thake kadam,
jab bhar aaya mann,
na dikha kinara jo lete ghadi bhar dum
umr hai beeti,
nikle kitne basant,
lakhsya ab bhi dikhe nikat,
duur reh jaaye fir bhi anth
karun jo chintan, jo sochun kya tha uddeshya,
yatra hai jaari kintu tha kya lakshya
antim padaav pe pahuncha jeevan rath,
dikhe na chhor bas badhta jaaye yeh path
ab sochun kyun chhoda woh basera,
jab tha sukhi mera woh ek dera
thaga kisne mile kisko yeh dosh,
mann me hai glani fir kispar yeh rosh,
kat gye pal,
jinme tha woh kal,
wahin tha ujaala, thi bikhri wahin muskaan,
jeevan tha saral wohi, tha wahin sab asaan.
No comments:
Post a Comment